ثلاث مواضيع أشتي أتكلم بخصوصه .. الموضوع الأول بخصوص مشروع سفلتة المطار وتطوير بعض المرافق فيه ويختتم بقوله للإنعاش الإقتصادي!!
سؤالي هو عن أي إنتعاش إقتصادي يتكلموا والمطار حقنا منه غرفة و داره و حي الله تنزل فيبه طيارتين يمنية من حق الله طلبنا سارحين مروحين زي الدلالة أم الدروع، وأسعاره تفوق الأسعار العالمية، و مانعين أي طائرات أجنبية تدخل باب المنافسة و رافضين يعطوهم تراخيص، فعن أي إنتعاش إقتصادي يتكلموا..!!
الموضوع الثاني، هو بخصوص تسمية شارع الكورنيش بأسم المرشدي رحمة الله عليه، من قبل مديرية المنصورة..!!
أولا القرار هذا يجب أن يأتي من السلطة التنفيذية في المحافظة بعد رفع المقترح من قبل المديرية علشان نقنن كل شيء مش هو تهبيش وقرارات تخازين. وثانيا اللوحة اللي ركبوها تقول من حق بيارق الهاشمي ستة في ستة فوت مايستويش، لأنه في لوحات معدنية متخصصة لهذا الشيء تحطهم في بداية ونهاية الشارع، مش تجيبلي بانر سع رأسك وتركزه بوسط الشارع لما يغبر..
الموضوع الثالث وهو الأهم، وقف شغلة التصاوير اللي أستوت إدمان من قبل للمسئولين، يقولك علشان نثبت للناس بأن نحنا نشتغل من أجل تحسين الخدمات، والكل عارف الشغل التيري بيري حقكم لا تزنطوا علينا ولا شيء، الموضوع ومافيه كله شغل تلميع من قبل بعض أصحاب الدفع المسبق وقد نحنا دافنينه سوى، شغلك يا مسئول با يبان لو قدمت خدمات من صدق حتى بدون ما تتصور فمافيش داعي لشغلة عبدالسميع اللميع بالله..
