بين إهمال مستشفى ابن خلدون وملاحقة أرزاق البسطاء.. أين أولويات السلطة في لحج؟

علاء سلام العزيبي

في ظل الظروف المعيشيه الصعبه اللي يعيشها المواطن في محافظة لحج صارت الخدمات الصحيه هي الهم الاكبر للناس خصوصا مع التدهور الواضح اللي يشهده مستشفى ابن خلدون اللي كان المفروض يكون الملاذ الاول للمرضى والفقراء من ابناء المحافظة والمناطق المجاوره

اليوم المواطن داخل المستشفى يعاني معاناه كبيره من أهمال ونقص في الادويه والكادر الطبي والتمريضي وغياب المتابعه الحقيقيه من الجهات المسؤوله مع تردي النظافه والتجهيزات الطبيه بشكل يخلي الناس تحس انهم متروكين لمصيرهم بدون اي اهتمام

المشكله ان المستشفى اللي لازم يخفف الام الناس اصبح يزيدها والمواطن البسيط اللي ما يقدر يروح مستشفيات خاصه ما عاد يلقى حتى ابسط حقوقه في العلاج وسط صمت مؤلم من الجهات المعنيه

خلونا من الاهتمام بالمظاهر والحملات الشكلية وابدأوا بالاشياء الاساسيه اللي تمس حياة الناس بشكل مباشر اليوم الناس تحتاج مستشفى يشتغل بشكل صحيح وخدمه صحيه حقيقيه قبل اي شي ثاني وكمان ملاحقة البسطات والعربات اللي هي مصدر رزق لكثير من الاسر في هذا الوضع الصعب ما بتفيد اذا كان الوضع الصحي بهذا الشكل.

وعلى السلطة المحليه في لحج تتحمل مسؤوليتها وتتحرك بشكل عاجل لانقاذ مستشفى ابن خلدون من الوضع اللي هو فيه وتوفر الادويه والاطباء والممرضين وتحسن الخدمات والرقابه لان صحة المواطن ليس شي ثانوي بل واجب انساني قبل كل شي

استمرار هذا الوضع بدون حلول بيزيد معاناة الناس وبيفقدهم الثقه في المؤسسات الصحيه في وقت هم احوج ما يكونوا فيه لجهة ترحمهم وتخدمهم مش تتركهم يعانوا بهذا الشكل...