لا تبيعو الوهم للشباب

إلى " كثير " من مدربي التنميه البشريه ماتبيعوش الوهم للشباب ، كفايه الي هم فيه ، حدث من كم يوم اني رافقت احدى الشابات الصغيرات المتطوعات في العمل معي الى دورة تدريبيه انضمت لها البنت دي و دفعت رسومها مبلغ كبير جدا وانا عارفه انها تعبت عشان تدخره ودا في مقابل حصولها على شهادة اجتياز دورة تنميه بشريه توعد وعد قاطع ، وبدون اي ضمانات ع الوعد ، ان خريجيها في ظرف ايام معدوده بينتقلوا نقله نوعيه في حياتهم وبيتغير محيطهم بالكاااااامل .

وزيما يحصل في كل مره وبشخصيتهم المتقاربه بياعين الوهم ، بدأ المدرب يتبختر كأنه بيل جيتس وعينه على بنت حلوه جالسه قدام وهو لابس بدله بني في بني مكويه اكتر من اللازم ، وحط علبة كريم عشان يغطي اجهاد الشعر التعبان من كتر الكدب ،طبعا كانت البدله باين انها افضل مايملك بين كل مقتنياته يعني حاجه كذا لزوم الشغل بس تعال ركز معي كده في الساعه الواقفه في يده و الجزمه المتبهدله من كتر المشي وركوب المواصلات ،بس الشباب كان عشمهم عاميهم عن التفاصيل ، وياعيني مساكين عيونهم تلمع مع كل نطه وصفقه للمدرب الي معيش نفسه في جو وهمي من السعاده الكذابه

"هو بعينه الوهم " الوهم اللي من السهل بيعه لخريج جامعي يبحث عن ابسط امل في الحصول على وظيفه او لشاب امضى الكثير من سنوات عمره وهو يدور في نفس الدائره ،كنت اراقب بحسره عيون الشباب والبنات وهزة راسهم بالموافقه وهم مشحونين في جو من الايجابيه الي ممكن تطلعك للسما بس عند اول خطوه لك خارج حدود المكان تخليك حاسس ان فيك شعور متخبط وانك مش فاهم انت وضعك ايش بالضبط! بجد كانت عيونهم تلمع بالاعجاب كان شكلهم جميل لدرجة اني لقيت نفسي اني اقول يارب يكون ذا حالهم كل يوم وهم في وضع مستقر في حياتهم ، يارب ماتنطفيش الابتسامه دي عند اول معترك مع الحياه العمليه ، يارب ويارب يرحمهم شويه من كل التمثيل دا

حرااااام والله حرام وفجأه صحيت من كلامي لنفسي دا والي صحاني صوت المدرب وهو يقول :

يلا كله يحط يده على قلبه ويقول" انا اقدر " قولها ١٠٠ مره

راقب يومك الجاي كيف يتغير ، خلاص خلصت ؟ يلا ابتسم ابتسم ، الكون كله بيجيلك احد عندك عشان انت مبتسم ،وكان وقت المحاضره بيعدي بتكرار كلمات وابتسامات ونطات هنا وهناك .

بعد كميه من التهريج كان يسألهم ها ؟ عندكم احساس جديد مش كده! وياكد انه عندهم احساس جديد ، وكل واحد يشوف الثاني باستغراب وشعور بالحسره انه يمكن في شي غلط فيه انه مشعرش بأي تغيير من الشو الي حصل قدامه ، وممكن تلاقيه استسلم للضحك وواحد تاني يمكن ابتدى يفكر ويفكر كيف ممكن يسوي التمرين دا لما يلاقي رسالة الرفض جايه له على الايميل وهو يشوف الكم وظيفه الي قدم فيهم كلهم رفض، وتجي على باله البنت الي اتقدم لها وهو مش جاهز ويصحيه الرفض ،،،ياترى وقتها بيعرف يبتسم !!!! لقيتني فجاه وقفت وقلتله والله حرام عليك الي جالس تعمله فيهم خليك واقعي قلهم انه بكره يمكن مايكونش احسن بس نحن بنستمر نحاول قلهم متيأسوش وجددو املكم في كل يوم بس بالله ماتضيع يومك وانت واقف قدام المرايه تقول ١٠٠ مره انا اقدر وبس ، قلهم انت تقدر لما تتعلم شي جديد لما تستثمر وقتك في تعلم لغه جديده ، او حرفه جديده ، لما تقوي شبكة علاقاتك وتحط نفسك في اماكن تواجد الفرص ، قولهم يا مدرب يامحترم الحقيقه الي انت جالس تعاني منها كل يوم لما تلاقي زوجتك جايبه لك لسته تعتبرها انت مستحيله من طلبات البيت قول وقتها ١٠٠ مره انا اقدر وخليها تقول ١٠٠ مره وانا اصدقك انك تقدر. ماتكدبوش عليهم بكلام فاضي وتخليهم يخرجوا من الدوره التدريبيه زي البالون الي مليان هوا من وهم وعند اول شكة دبوس حياة ينفجر ويتبدد كل ده ، علموهم بالصدق ومن قصصكم ومن تجاربكم الحقيقيه ، ارحموا هذا الجيل ارحموا حالهم لان الي جالسين يسووه الكثير من المدربين هو انهم يخلقو جيل مُحبط يعتبر انه فشل عشان لما مشى طول اليوم مبتسم الحياه مابتسمت له. وانتوا يابنات وياشباب اقرأو التاريخ اقرأو عن العظماء واتعلموا من تاريخهم ،مش من شخصيات مهزوزه اختارت تبيع الوهم لجيل بحاله عشان تعيش . وعندكم الانترنت مليان فرص ،، اتعلموا ، متخلوش ولا يوم يمر اللا وفي انجاز وفي اضافه جديده، علشان يوم ماتجي الفرصه تجيلك وانت جاهز وسيبكم من الوهم متشتروش منه .